咪走雞正宗葡國餐廳 (已結業)

阿妹係西貢友，由佢帶我去食飯，實無衰。今次佢帶我食葡國餐廳咪走雞，個中文名怪怪地，但食物唔錯，窗外風景更佳，一邊享受美景，一邊嘆美食，度過左一個愉快既晚上。窗外係西貢海，好多漁船泊響度，最好係中午或黃昏magic hour黎，否則一入夜，外面就會變成漆黑一片，咩風景都睇唔到。先黎個黑椒炸雞翼醫肚，呢個真係好正，黑椒夠香夠辣，而且廚師將雞翼拆成單骨，好易食，好想自己一個人食三碟！每人有一個餐包，可以塗牛油，亦可以點醋同橄欖油，果時個肚餓到打鼓，呢個大麵包可以話係及時雨，救我一命。白酒煮青口，夠肥美，師傅火候拿捏得準，青口上桌仍鮮嫰，好吃。肉醬意粉，普通，相形失色，可以不點。辣醬烤雞，我們只點了小辣，但個汁真係堅辣，食到我想噴火，雖然係咁，個皮烤得幾脆，如果食得辣既朋友可以試下。食葡菜，識食一定會食烤乳豬，咪走雞既乳豬做得好好，隻豬仔皮脆肉嫰，唔會好肥，惟一缺點係太細碟，我好想食多幾舊呀。飯後想食甜品，叫左紅酒烤菠蘿，無想像中咁甜咁好味，不過作為飯後果，都係唔錯既。順帶一提，呢度既服務都唔錯，臨走前，事頭婆送左杯雪糕俾我姨甥仔，仲由得佢揀味，開心死佢囉！