海雲天

營業中

休息中

好多粵菜廳都推出左點心放題，價錢都非常合理。對於一個鐘意飲茶嘅人嚟講，點可以唔試下呢。呢間係酒店入面嘅粵菜廳，唔單止有超靚海景之餘，待應嘅態度又超好，完全唔係平時酒樓咁款。尊貴品嘗每位有一件，富貴鮑魚撻嘅酥皮超酥脆，鮑魚好得意咁細細粒一隻，啱晒一啖過呀。芝士焗蟹蓋芝味都幾濃郁，有好多蝦肉係入面。花膠瑤柱灌湯餃，餃子好大粒，入面有多冬菇，湯底好清甜。花膠唔係一細塊！同餃子絕對有得揮呀！精選點心點心係一件件咁嗌，真係咩都可以試下。蝦餃嘅餡超級彈牙，質素比起食過嘅蝦餃高好多，係值得encore嘅。流沙包亦值得一讚，連我個唔食流沙包嘅朋友都對佢完全改觀。薑汁糕嘅薑味香濃又煙韌，正呀。鮮竹卷比較特別，係以蕃茄湯做底。精選小食椒鹽豆腐粒係十級好味，外脆內軟，真係好好好味，比起大排檔嘅更加滋味，完全無得頂。干煸四季豆都幾夠鑊氣！香脆南瓜餅有豆沙餡，入面軟糯，出面脆口，好滿意！