地點：九龍城啟德體育園
菜式：越泰菜
餐牌：下午茶套餐有18款主食，有粉有飯有多士等等，包飲品6選1，可以加錢升級飲品，或者追加小食。
7
2
青椰海南雞飯 $68 另加一
海南雞有十幾件，有雞脾，雞胸同雞翼，肉質好嫩滑，雞皮有彈性，點甜豉油最好食，另外仲有辣醬同薑蓉。配4片爽口青瓜。
油飯好香，暖暖地上枱，都大大碗。
跟有一碗蔥花蟲草花雞湯，好濃雞味，真係有蟲草花食。
河內手切牛柳湯河 $72 另加一
越式湯河配牛柳真係少見，牛柳真係生住上枱，自己用個熱湯整熟，都好嫩口，又唔肥，份量好足。河粉份量多，好滑溜，都可以選檬粉。個湯好清。加有芽菜，蔥花，洋蔥圈，芫荽同脆脆，可以加添清新同少少香脆口感。仲有一大件淋淋白蘿蔔。另上辣椒粒同青檸比你自己調味。
香茅烤豬頸肉 加$42 另加一
香茅烤豬頸肉一共八件，熱辣辣上枱，燒得外脆內嫩，口感同味道都唔錯，豬味夠濃。墊有少少生菜絲同酸白紅蘿蔔絲解膩。
跟餐飲品都有幾款揀。
菠蘿冰茶 跟餐
菠蘿冰茶好少見，茶味中帶適量菠蘿汁味，唔錯唔錯，下底仲有好多香甜菠蘿果肉，面頭加上一片薄荷葉。
芒果冰配芒果雪糕 跟餐加$8
芒果冰配芒果雪糕大大杯，滑溜芒果冰加上一球芒果雪糕，味道唔假，令人好滿足。
寒天米線椰汁冰 跟餐加$8
寒天米線椰汁味好香，飲完好似食完甜品，面頭加上少少綠色類似jelly條既寒天米線。
今餐食物質素不俗，餐廳裝修好光鮮，座位非常舒適。
