Burgeroom (美麗華廣場1期) (已結業)

今日出左尖沙咀行街，行行下覺得累就走入去商場抖抖，見好耐無食漢堡就一於食返餐先。先黎份小食先，牛油果芝士薯條，一望已經流晒口水，薯條炸到金黃色仲好香脆添，本身已經沾滿芝士，點埋個牛油果醬，上面仲有蕃茄添，呢個醬除左口感夠晒滑，食落仲相當健康呀，營養價值夠晒高。黎到就一定要叫返個漢堡，由於我鍾意食牛油果，就食個牛油果雞柳漢堡，嘩一食就口感超正，牛油果既滑加上雞肉既嫩，仲有裡面既雞汁添，加上雞柳本身有些少辣，令我覺得食起黎相當醒胃，比某大連鎖店既雞肉做得更出色。另外我仲食左另一款漢堡，就係大菇牛肉芝士漢堡，大菇焗到相當多汁，加埋牛肉味道夠晒濃，仲有牛肉汁滲晒出黎，所以食落相當惹味呀，加上漢堡麵包夠脆口，食落相當滿足。