煌府將軍薈 (已結業)

難得放假可以陪屋企人，就同咗阿媽去飲早茶，做個孝順女。近近地去煌府，早茶時間非常多人，唔知係人手少定係啲人太忙，門口並沒有知客，亦無員工幫手帶位，只能自己搵位。搵好位坐低之後，有兩個員工話唔比坐大檯，而其他細檯已經滿曬人無位，要求我哋轉檯去另一張大檯，於是我哋由酒樓左邊最邊緣既檯，移動到最右邊，響食點心前做咗唔少運動，消耗脂肪，哈。我哋嗌左鯪魚球，菜苗餃，雞扎，芋絲餅，點心大約等咗半小時嚟到，不過點心唔係好熱，只算是暖。菜苗餃入面有好多菜，但有花生，有啲似粉果餡加菜。雞扎比較大件，有魚肚，蟹柳同芋頭。鯪魚球有蜆芥，蜆芥有蜆肉而唔只係汁，感謝主啊，呢個係最好食既點心了。芋絲餅比較油，但就唔太脆，感覺似係放咗落鑊熱一熱，吸夠油就上碟，可能師傅知我熱氣，覺得太脆會喉嚨痛啦，唔俾我食香口嘢。兩個人食咗一百蚊，正常價錢。 可取之處係地方就腳，屋企落樓好快就到。