同人鍋 (已結業)

今週氣溫驟降……仲唔係出街滾兩滾嘅好時機！嘻！嘻！今晚叫咗雞煲，仲有原隻龍蝦放湯做湯底嘅海鮮拼盤連安格斯肥牛火鍋，和味呢！喺山林道一帶，都開咗唔少火鍋店，要突圍和令客人回頭，就要加多點新意！雞煲今次揀咗微辣湯底，對於並非辣椒控嘅人，已經好夠味！雞件入味唔老，有齊胸、脾、翼、鎚……滾得咁上下，落埋紅薯粉，滾兩滾，撈起掛湯，吸了辣汁，煙韌又刺激。跟住龍蝦湯底出場，水一滾就先撈起成隻大龍蝦，襯熱拆肉先嚐一下呢味海鮮霸王，啖啖肉㗎呢，建議蝦頭連膏繼續放湯，延續湯底濃味………之後海鮮拼盤登場，有鮑魚、廣島蠔、海蝦、青口、白蜆、魷魚、鯇魚、象拔蚌，和安格斯肥牛，各式蔬菜、冬菇、粟米、腐皮、黑墨魚丸、芝心丸、廚師腸、臺灣腸……全部擦曬都幾飽，而大部分食材仲可以無限任加，今晚又冇限時，可以大快朵頤。食到肚滿腸肥，加咗啲白菜和生菜，幫助消化，難得蔬菜都好新鮮……店家仲送咗芝麻湯丸和自家製紅酒雪葩比我哋，湯丸滾兩滾見透明就好食，邊爐後歎杯冰凍雪葩，零舍解滯降火，紅酒味加上藍莓酸酸地，為今餐劃上完美句號。