丼瀛 (已結業)

嚟到佐敦，想搵個午餐食，天氣咁熱，真係唔知食乜好。經過廟街，見到呢間日式餐廳，主打「丼」，啱晒啦，就食個刺身丼飯消消熱氣。一入到嚟真係透心涼，冷氣極之充足，角落有個半開放式廚房，有木枱同小木椅，木椅係慳位，但冇得「挨」就坐得唔太舒服喇。大大個餐牌有底面兩頁，最顯眼就係左上角「丼瀛龍蝦刺身爆丼$268」，好吸引咁，一於試吓。上枱時不禁「嘩」一聲，都好大「座」！樓高兩層，上面係刺身丼，塞滿刺身，仲有一隻龍蝦。先將隻龍蝦上碟，龍蝦肉雪白彈牙，有「羔」，羔就好甘香，但龍蝦肉就唔夠鮮味。有好多款刺身，唔知係咪睇當日食材而定，每款都有一兩片，仲要厚切。另外仲有糖心蛋醬油漬、蟹籽、三文魚籽。食完上層，拎開個碗仲有下層，感覺有啲打塔咁，一層層攻破佢~~下層係蒟蒻沾麵，第一次食蒟蒻麵，入口幼滑又好爽口，質地真係好特別。麵身幼，掛汁能力特別高。中間嗰碗係凍海膽芝士醬汁，用嚟蘸麵食，涼透心，爽呀。送左碗日式麵豉湯，唔會太鹹，豆腐夠多。一個人食一個爆丼，真係好飽，有啲爆肚感覺添。下次都係叫埋朋友一齊嚟，試多幾款野食。