仲有個細節好加分——訂檯之後店家就主動跟進菜單類型，問清楚大家口味同需求，務求啱晒每位客人，呢份專業真係好難得！
講返服務，因為我哋話要慶生，店家直接送咗滷水鵝肝同鵝腎，呢個優惠著數一定要拎！建議大家去慶生記得話俾店家知，有驚喜架！仲有啊，我哋自己帶咗啤酒，坐低冇幾耐侍應就主動拎冰桶同酒杯過嚟，反應超快，完全唔使多講，抵讚！
滷水拼盤：有手撕雞、金錢肚、豬大腸，每樣都滷得好夠味，鹹香啱啱好，送酒一流。
冬瓜瑤柱海鮮羹：冬瓜入口好清甜，有瑤柱蝦球，羹好滑溜，飲落好舒服。
花雕蛋白蒸龍躉球：用40幾斤重嘅花尾躉先劏出嚟嘅肉，入口超彈牙！下面嘅蛋白底夠滑，咬落仲有淡淡花雕香，鮮到冇得彈。
即磨胡椒炒大肉蟹：佢哋用嘅係自家研磨胡椒，香氣夠晒！蟹個頭大，蟹肉滿滿又清甜，胡椒味唔會蓋過蟹鮮，食得好過癮。
蟶子：新鮮到咬落有汁，鮮甜夠味，係海鮮控必點！
士多啤梨骨：排骨煮得好腍，唔會老鞋，帶住士多啤梨嘅甜味，小朋友都鍾意食。
- 荷羽雞：呢個真係招牌！用清遠雞挖空，裏面塞滿滷水乳鴿、鹿茸菌同米飯，再用荷葉包實慢蒸3個鐘以上。雞肉咬落又嫩又多汁，滿滿荷葉香；內餡嘅飯吸晒雞汁同鴿汁精華，一粒都唔會剩！
雖然工廠區有啲遠，但講到呢個價錢，要喺大酒樓食到同等質素嘅餸？根本係笑話一樁！下次朋友聚會或者慶生，我肯定再揀呢度！
