但其實我非常鍾意食中菜，尤其是食海鮮同埋粵菜，相對濃油赤醬既滬菜，或者麻辣香厚既川菜，粵菜更著重食材既鮮味同師傅既功力， 但可惜香港食到正宗同埋靚嘅粵菜嘅地方唔多。
不過好好彩 ， 朋友介紹我同男朋友仔去呢一間御膳私房菜度試下。 不得了，我諗我會bookmark呢度，做日後嘅飯堂，獎賞自己。
由於怕冇位嘅關係，我地一早就book 定檯， 最開心嘅係呢度同出面唔同，有得按人數去選擇，同埋按自己喜歡嘅食材去揀套餐，而且一去到餐廳就有得食。 作為蟹迷嘅我梗係要試下呢度嘅大肉蟹啦。
二人套餐既前菜係麻辣手撕雞， 青瓜切成幼絲， 清爽脆身 ，手撕雞充滿麻辣醬香味， 而且雞絲長短不一，非常索汁， 冰冰涼涼嘅口感 ，加埋麻辣香，非常引起食慾。
不過我見到隔離枱多啲人嘅關係，佢哋嘅前菜就係一個麻辣拼盤，除咗雞絲仲有其他鹵水，份量唔細咁， 希望下次有機會，同多啲朋友一齊嚟試下啦。
黐完前菜跟住出場嘅係什菌豆腐大蜆湯，一睇就覺得吸引，好少地方可以將湯頭煲到濃沃嘅奶白色，仲白過牛奶。
是真啲湯底其實應該用咗新鮮魚同大骨煲湯， 加上豆腐同大蜆，個湯鮮味十足，好有屋企嘅味道， 但當然係更加足料，而且雜菌吸收曬湯頭嘅鮮味，足料既程度，我覺得唔只係一個湯，而係一道菜。
可能我影得有啲細，但其實隻蜆係有兩節手指咁大， 蜆肉鮮甜冇沙，真係想嗌多兩碗飲下。
蒜蓉粉絲蒸蟶子皇， 雖然係最簡單嘅蒜蓉粉絲蒸，但亦都係最能夠帶出鮮味嘅煮法，越係簡單嘅方法，其實更顯用心， 淨係 蒜蓉都已經用咗金銀蒜，即係普通蒜蓉同埋豉油煮過嘅蒜蓉， 蟶子皇非常大隻厚肉，食落啖啖都係汁， 加上粉絲吸曬豉油汁同時蟶子汁嘅香味。
「小二，唔該嚟多兩碗白飯。 」
胡椒炒大肉蟹
大肉蟹非常足斤兩，目測起碼斤幾兩斤，因為淨係蟹鉗都大過拳頭， 同埋師傅好細心咁將胡椒打磨到好細，咁樣撈埋薑蔥做芡，帶出肉蟹嘅鮮味，加上走過油嘅關係，鎖住咗蟹既肉汁同水分，乾身得來外脆內juicy，三個字：無得輸。
如果係西貢食呢碟蟹都起碼二百蚊啦。
除番開呢個套餐其實每人400幾蚊，真係抵到不得了。
淨係蟹鉗都大過我隻手，啖啖都係肉，不得了。
花雕蛋白蒸龍躉球
龍躉球起曬肉，啖啖肉冇骨，魚皮厚身，充滿骨膠原嘅味道，彈性彈性。 除咗鮮甜實肉之外，都冇咩說話好講了，反而我想讚下個蒸蛋白，事關個蛋白用咗上湯同花雕去蒸，滑過豆腐之外，感覺就好似係食緊豆腐花，不過係上湯味嘅豆腐花。 唔係太識形容，口感介乎於飲湯同食豆腐花之間。
細細聲講，我食曬呢個蒸蛋白，冇留到畀男朋友食，哈哈。
1
金絲翡翠鳳尾蝦
上面嘅金絲其實係用金華火腿燴咗嘅魚翅， 充滿火腿絲既香味， 配上非常之彈牙可口嘅鳳尾蝦，可惜一人只有一隻啦，哈。
雖然配菜好似係簡單嘅節瓜同冬菇，但節瓜清甜，蒸得剛好，冬菇厚身重菇味，夾埋魚翅食又係good good good 。
其實食到呢個位我已經八成飽，已經非常大滿足， 唔好睇每碟菜嘅份量好似少少哋咁，但原來食落真係可以好飽，仲可以試到每種唔同嘅菜式。
蒜片牛柳粒
我諗係男士嘅 favorite， 蒜片炸到脆卜卜，加上牛肉充滿蒜香，又係一個惹味嘅小菜， 絕對好啱送飯。而每粒牛肉都係mini bite size,， 女士就算飽飽哋都可以食幾粒過下口癮。
蟹油銀芽炒麵
蟹油呀嗚呀， 一嚟就聞到超香嘅味道， 再加上炒得非常之乾身有鑊氣， 真係好難忍口，幾飽都要食埋佢。
芒果布甸
至於甜品就係充滿懷舊味道嘅芒果布甸，梗係要落番少少花奶落去搵番兒時嘅味道啦， 加上大大粒嘅芒果肉，甜品胃被滿足了。
成張單total九百零蚊，除開每人400幾蚊， 其實同去西貢食海鮮既價錢分別不大，不過質素就高好多。 而且唔使喺西貢俾人劏， 食嘅真係一分錢一分貨，值啦。
