德興日式放題鍋 (已結業)

今晚同個死黨兩個麻甩仔飯聚傾吓計，見好耐冇打邊爐，一於來個男人的浪漫。身為牛魔王嘅我哋，當然係食任食牛肉邊爐啦，醒起呢間德興轉咗做日式火鍋放題，一於試吓佢。一室黑色型格裝修，每張枱都設有獨立嘅玻璃屏風，夠晒私隱度，唔怕嘈親隔離張枱，抵讚。Menu設有多款選擇：普通美國牛肉($158)，美國牛肩肉($178) ，極上美國牛肉($198)，特級安格斯牛肉($268)同埋極上日本和牛($388)。由於我麻麻哋日本和牛，最後揀咗極上美國牛肉。除咗牛肉係任點，其他嘅火鍋材料就設在自助吧，自己搞掂。食物種類一般，大路嘅丸類如墨魚丸、魚蛋、豬肉丸等都有，蔬菜就有蘿蔔、粟米、枝竹、雜菜等等。飲品方面呢度都有幾多不同口味選擇，罐裝汽水、檸檬茶、蜜桃茶、雪梨茶等。至於食物質素，一般啦，起碼唔會得雪藏味，都食到原本嘅肉味同丸味。老實講，二百零蚊放題任食的牛，又點可以同散叫一碟都已經過＄300嘅牛肉去比呢！仲要飲品同埋其他食物都係任飲任食，算係咁喇。十多年前食任食打邊爐，大概＄200左右; 十多年後都係多幾廿蚊，人工租金食材樣樣都加，匯豐卡仲要有個九折！！我做食客梗係開心啦，做飲食生意真係唔容易...弊傢伙，