✨前菜：野菜沙律
紫色同綠色沙律菜好新鮮，車厘茄超甜！酸甜帶果香的沙律醬汁好開胃，令人胃口大開～
✨茶碗蒸
茶碗蒸用鐵板製作好特別，內裡有鮮甜的蟹肉，加了一些魚子粒，蒸蛋啖啖超滑溜！
✨北海道帶子 + 炸北海道白粟米鬚
呢道創作料理真係不得了！北海道帶子夠厚身鮮甜彈牙，煎到剛好不會太老，外層是炸到香脆嘅白粟米鬚，第一次這樣吃！上層還有奈良漬他他醬同三文魚子嘅鹹香，配搭底下煎香嘅翠玉瓜同自家製蕃茄醬，味道豐富到令人難忘～
✨煎銀鱈魚
魚皮煎到脆卜卜，銀鱈魚肉質滑溜到不得了，有淡淡魚香！昆布牛油汁香濃唔膩，底下嘅茄子吸盡精華，正！
✨A4宮崎和牛薄燒
師傅好貼心問我哋要咩熟度，我哋交俾師傅發辦！壽喜燒風味A4和牛油脂分布均勻，配埋生蛋汁同菠菜大蔥冬菇，入口即化，幸福感滿滿～
✨赤麵豉湯
比平時淺色的麵豉湯，味道比較濃郁，有回甘的香味～
✨蒜蓉炒飯
炒飯粒粒分明，蒜香十足，仲有啲煙肉增添鹹香，配埋漬物一齊食，完美！
✨自家製Gelato
焦糖咖啡雪糕香濃順滑，用杯盛載更添華麗，為呢餐畫上完美句號～
真心推薦俾鍾意食鐵板燒嘅朋友，$480有咁高質素，仲要係米芝蓮入選餐廳，絕對要encore！
