百樂門宴會廳 (已結業)

昨晚睇英超真播睇到凌兩點幾，今日一於來個自然醒，瞓到十點幾才起身。放假，一個人好自由，諗下點樣去 Hea 番一日先。第一餐，不如去嘆下茶，總好過去吃西式的 brunch，不過，又怕人多，諗諗下，就去咗較為吊腳的一間酒樓，貪佢呢個時間唔會多人。間酒樓位於葵興。以前是工廠區，現在很多工廠大廈都轉為商廈，更有些被大財團收購後改建成為大商場、大商廈和服務式酒店，活化了這區。時間尚早，附近的打工仔還未湧到來吃午飯，所以，酒樓較為冷清。侍應說﹕「隨便坐」，其實真係隨便任我揀位坐。卒之，揀咗個靠近窗口的座位，坐下，點了一壺香片。水滾茶靚，哆落有茶味，算唔錯。睇下張點心紙同小食紙，諗來諗去都唔知揀咩好 (選擇困難症又發作)。見隔離嗰檯食緊銀芽肉絲炒麵，睇落都唔錯，唔執輸，我都點番一個先。碟炒麵好鬼大碟，銀芽、肉絲、木耳、韮黃蘑菇茨汁舖滿麵，好彩無叫其他點心，否則，食唔晒會做大嘥鬼! 鍾意吃銀芽肉絲炒麵的原因好簡單，就是貪佢一個麵，一開始可以吃到熱辣辣脆卜卜的口感，然後就是茨汁滲入麵內之後，變成軟林林，不知幾過癮! 而這個炒麵又真的沒有令我失望，滿足到我預期的兩種口感，味道又好，點一些浙醋來吃更加好味。