Apinara

營業中

休息中

每次午飯時間經過APINARA都見到長長嘅人龍，原來大有來頭，係曼谷米芝蓮推介NARA THAI嘅姊妹店，連續10年獲選為泰國曼谷最佳食府。餐廳裝修優雅別致，座位闊落。泰式椰子雞湯🌶每個午市套餐都可以揀冬陰功湯/泰式椰子雞湯，今次試咗泰式椰子雞湯，除咗椰香味，仲會食到酸酸辣辣嘅味道，唔食辣嘅朋友記得同店員講走辣。泰國滷水豬手配白飯每日限量供應，豬手肥瘦適中，充滿膠原，表皮爽口，肉質軟腍，泰國滷水汁偏甜味，煮得頗入味，配埋泰式辣醬，可以沾少少增添風味。泰式金不換香辣大蝦炒河粉🌶大蝦🍤 爽口，泰式河粉比較大塊有口感，加入金不換後有陣陣薄荷香氣，仲配埋辣椒炒香，令人開胃。跟餐小食、甜品用三小碟裝住，有新鮮菠蘿粒同埋炸蝦肉卷做前菜，炸蝦肉卷賣相好似一個布袋，皮炸至非常脆，蝦肉充滿鮮味，水準之作。甜品係椰汁糕，底層係椰肉蓉，味道清新又香甜。