仙味凡香 (已結業)

朋友在金鐘返工，經常投訴金鐘係沙漠，食lunch冇咩好選擇。朋友難得今次介紹兔子去呢間喺太古廣場附近嘅台式餐廳「仙味凡香」，就一於去試試啦！呢間餐廳門面不算大，但裝修簡潔企理，而且係獨立一格格嘅座位，比較適合1至2人嘅聚餐。另外，餐廳係提供自助點餐，非常方便！兔子今次點左韮菜豬肉餃雞湯麵同凍檸檬茉莉茶。雞湯麵好入味，配上皮薄、多肉汁嘅韮菜豬肉餃，好味！配埋台式特飲凍檸檬茉莉花茶，甜度適中，啱晒咁熱嘅天氣解解渴。另外兔子同行嘅友人點左韮菜豬肉餃蔥油拌麵同凍蘋果茉莉茶。拌麵配上蔥油嘅香味，非常開胃惹味。再飲杯茉莉花茶，可以一解油膩感，讚！呢間台式餐廳嘅食物份量適中，價錢唔貴。如果嚟開金鐘食飯，或者喺附近返工嘅朋友，「仙味凡香」真係一個好選擇！