大班樓 (已搬遷) 新店位置

本來我唔明點解呢間餐廳咁難訂位，食完之後，我開始明白。一坐低，我見到有金錢雞的介紹，每天限量發售，因為要用黃沙潤嘅關係，一日先得二十份。我哋七點半到達，已經只剩下三份，五個人，不夠一人一份。侍應話，即叫即燒，八點三出爐，有冇問題？緊係無問題啦。我哋先食咸魚煎肉餅，掂！餐牌話唔用梳打粉，真係嘅，有咸香，有肉味。清酒魚湯煑蜆，唔錯，蜆肉很新鮮，魚湯非常甜。金錢雞嚟啦！其實這個菜我不是吃過很多次，因為唔係咁多地方做，兼且很多地方做得麻麻，雞潤很乾，加一個甜到死的汁。大班樓的確不同，細件一點，但鬆化很多，燒得很香，亦唔乾。最好是底下嘅小饅頭，夾住一齊食，口感好好。剁椒蒸頭腩，又係好嘢。雞油花雕蟹，正如其他人講的一樣，食到唔停得口。因為大家講得太多，我喺呢度不再介紹。再來青花椒麻辣雞，嘩，非常刺激，不是太辣，但很麻很香，值得一試。甜品係杏仁茶，香到入心。藍棗糕清甜，比紅棗糕有牲格。飽到唔識郁。而家我明點解咁難訂檯。