金記冰室 (已結業)

本身想去朋友屋企食飯，去到先至發現無水。唯有落街食啦。俾我醒起北角有間金記，忽然好想食佢嘅小菜同埋西多士。小菜點左涼瓜班腩煲同蝦乾韭菜炒鹹豬肉呢度嘅涼瓜斑腩煲好出色又惹味份量夠多，斑腩唔係數埋得兩三件，而係至少有半煲都係，每件都好大舊，而且有肉，涼瓜炒得香又不過淋，有鑊氣。至於小魚干韭菜炒鹹豬肉更加好味，鹹豬肉鹹香無比肥瘦適中，唔會剩係得肉咁單調，又有豬肉又有脂肪仲有豬皮嘅鹹豬肉先係美味啊！魚乾份量都唔少，呢度嘅晚市小菜鑊氣夠而且份量足，絕對係家庭小菜晚餐之選。仲叫咗枝我好喜愛嘅麥精，冷熱都有供應。晚市$7x 位有咁精美小炒，朋友話煮小點飯落泥食仲好！