可能是假期的原因，茶餐廳客人很少，人手也唔係太多，揀好了所有食物之後，即使主動搵夥計過來落單，一係扮見你唔到、一係就話等陣先，差不過過了五分鐘才能夠成功落單，與同系其他分店的快手快腳的服務有明顯差距。
餐牌上的選擇較「金記冰室」冰室多很多，除了經典的港式茶餐廳食品如奶茶咖啡三文治公仔麵之類，炒粉麵飯及中式小炒的款式也較重新開業的進化版「金記冰室」多很多（另見筆者的《換上新裝》），甚至有廣東燒味供應；很明顯就是迎合附近寫字樓的生意。
一入到餐廳，就見到一個燒臘檔；雖然對一間傳統港式茶餐廳賣廣東燒味有所保留，但外表望過去又好似相當對板，於是叫了一客假日午餐A - 叉燒燒肉飯（$65）。是日例湯都是茶餐廳最普遍的青紅蘿蔔煲豬骨，味道相當不錯、又足料，只可惜唔夠滾熱辣，缺少了中式老火湯的其中一個重要元素。
熱奶茶的茶杯表面印了大大個「金記冰室」嘜頭，即使餐廳環境欠缺了「金記」風情、及提醒食客身處「金記」用膳的裝修特色；單憑這個茶杯已經足以驗明正身。
叉燒燒肉飯十分多料，而且鋪排得相當整齊，從賣相來講，比預期的質素為高，甚至比坊間的燒味茶餐廳更好。至於燒味的賣相方面，叉燒欠缺蜜汁，又是全瘦肉叉燒、並非半肥瘦，唔稱得上係靚叉燒。燒肉就明顯優勝得多，除了表面的脆皮之外，肉身肥瘦相間，又沒有黏連著任何骨頭，簡直是一件燒腩肉。
一如所料，叉燒欠缺蜜汁香甜、肉質不夠鬆軟及缺少了脂肪的香滑；幸好未至於粗鞋，只不過肉汁確實不夠豐富。
燒腩肉皮脆肉香。表皮鬆脆，脆皮下層的白色豬肉爽口結實、底層的淺啡色脢肉腍滑，加上夾雜之間的薄脂肪層，好味道。只是始終不是真正的燒腩仔，唔夠細件，未能夠一啖一件；而且，叉燒的豉油汁稍為影響了燒腩仔所應該有乾身香口，幸好豉油汁份量不多，未至於將脆皮浸軟。
生炒牛鬆炒飯（$58）外表一般而已，飯粒唔完整、又炒唔到粒粒分明，一小糰一小糰黏結在一起，雖然未至於結成一個個小飯團，但肯定唔係一點靚炒飯。味道偏鹹，飯粒又太過乾身，估唔到竟然較燒味飯難食。
金記1967套餐 - 鮮牛肉通粉配煎雙蛋跟牛油多士（$42），轉出前一丁加 $5。見到碗公仔麵之後馬上一呆，點解只是一碗滾水淥出前一丁？湯底味粉及麻油分開另上？莫非就只是為了證明如假包換採用獨立包裝的《日清》麻油味（紅色包裝袋）出前一丁？這種安排簡直是徹底失敗！需要清楚明白這一碗並非杯麵，而且出前一丁送到客人面前時，滾水溫度已經大大降低，不再適宜加入湯底味粉及麻油；更無法藉着滾燙的熱水帶出麻油及湯底香味。出前一丁的淥麵時間是否恰到好處、麵條有沒有過腍，已經變得完全不重要了。至於聲稱的鮮牛肉，味道同樣非常一般。
同樣失望的是那一份多士炒蛋。雖然多士烘得算相當均勻徹底，但卻只是微暖。炒蛋更是差得可憐，唔夠厚身都已經唔係重點，最大問題在於炒成一底、十分粗嚡，表面甚至呈現淡淡金黃色的焦香，與理想中的炒滑蛋差距十萬八千里。這份真的是經典的金記1967套餐？
幫襯過幾間「金記冰室」分店，一直覺得質素相當平均，只不過今次的經驗實在有些差強人意，到底是這間分店真的有問題，抑或只是復活節假期的間竭性情況？埋單時候又發現金記1967套餐變成了 $48 + $5 = $53，與餐牌上所標明的 $42 + $5 有所出入；估計餐廳放錯了錯誤時段的餐牌，這種不小心的錯誤往往就會造成不愉快事件，作為一間算得上有些規模的小型飲食集團，實在應該要避免這些錯誤的出現。
