大學教職員會所 (已結業)

好耐冇入過中大，亦都冇去呢間教職員會所餐廳一排，皆因佢之前close左一陣。聽朋友講佢轉左人做開番，好彩同之前一樣，唔駛係教職員，係中大訪客都食得，即係任何人都得。入到去第一個感覺係比之前光猛左，同擺位都比之前闊落左，可能星期六冇咩堂，又或者大學開始放假，人唔多唔駛等位。叫左個西冷牛扒5成熟同咖哩豬扒飯，跟餐有湯有包有餐茶。牛扒5成燒得剛剛好，味道同肉質都絕對係可以媲美出面高級扒房百幾二百蚊既扒，一大驚喜。更喜出望外係咖哩豬扒飯，咖哩唔係甜咖哩 (我鐘意，加晒分) 有點辛口，咖哩味超香。豬扒份量十足，炸得外脆內軟。可惜太好味，食完先醒起冇影相。埋單要加一，不過如果用恆生中大咭好似加5%。感覺比之前好左唔少，加上唔駛同人逼，絕對值得推介。