功德林上海素食 (世貿中心) (已結業)

話說之前日蝕，長輩話嗰日唔可以殺生，所以要食素，本身對齋鋪印象唔係咁好，覺得啲餸都會偏油膩，但係功德林又真係俾到我驚喜。前菜佢哋提供左紫菜花生，有少少糖，食落去甜甜地鹹鹹地咁，最後比我一個人食晒 首先上菜嘅係宮爆猴頭菇，食落去辣辣地幾惹味，但係唔係好食辣嘅長輩都接受到。食落去都幾有雞肉嘅感覺，可能因為平時食開猴頭菇都係煲湯嘅餸，覺得佢哋煮嘅猴頭菇比較爽口。之後嚟咗一個上海冷麵，提供左幾款唔同嘅醬，有辣油、豉油、醋、花生醬等等，因為未試過所以都幾得意，但係略嫌麵有啲乾。紅燒豆腐幾好食個五福臨門前菜拼盤反而係最遲先到，味道還好，尤其魷魚鬚都整得幾似，雞絲粉皮因為冇太多調味同烹飪方法掩飾，雞肉做得唔似，仲唔知點解有火腿(?)整體來講成餐晚飯冇平時食齋嗰種老人家先會去嘅感覺，反而現場見到好多遊客或者外國人都會去，所以素食來講應該係屬於比較容易接受。而且窗外面就係遊艇會同維港景，環境都幾舒服。