板上 (中海日升中心) (已結業)

餐廳係中海日升中心地下，呢區餐廳林立，行到盡頭就係板上。呢間餐廳都真係好大，第一秒以為係food court，而且座位好闊落又多位。我去嘅時候係禮拜日lunch time，都唔需要等位，週末食飯時間去一般都有位坐。空間大仲有個好處，就係人多都唔會嘈，係呢頭行完可以同朋友坐低傾計食嘢，而且仲有wifi，又冇時限任坐，只需要買d 小食、飲品，就坐一日傾一日都得。佢地咩類型食物都有，日式料理、pizza、burger、飯、麵、小食、啤酒飲品咩都有，而且平貴選擇都有，大概50蚊度就有一個飯加飲品。我見鰻魚飯大大條鰻魚都係$85，跟餐有飲品，加$8轉左蕎麥麵。鰻魚好大塊而且都幾厚，口感有d似黃鱔肉，同係日本餐廳食嘅鰻魚口感有d 唔同，佢嘅肉質比較有彈性紮實d，而且冇乜骨，加上鰻魚汁，都幾好味，唔會腥。不過鰻魚微溫，可以熱d 就好啦。蕎麥麵配有凍湯汁，撈埋食的確幾清涼，味道都係ok 嘅。玫瑰花茶嘅茶包都幾靚，飲落淡淡玫瑰花香加比較濃郁茶味，幾解膩。呢間餐廳裝修其實唔錯，幾舒服，仲可以任坐，夠曬大週末都唔怕冇味，又唔會俾人趕，可以坐低休息下傾下計。