Orange Elephant Thai Restaurant (和富) (已結業)

呢一間位於北角和富中心地下嘅《Orange Elephant Thai Restaurant 》， 係朋友介紹， 位於港島區嘅一間非常抵食嘅泰國餐廳。喺疫情難做嘅情況下， 呢間餐廳每日一蚊優惠價，救市大行動。 喺一至日都會推出咗唔同款式嘅一蚊特價菜。星期日就推出咗一蚊《黃咖哩雞》。 呢一個咖哩雞份量唔算少， 雞片嫩滑無骨， 而且又有長青豆， 紅辣椒等配菜， 黃咖哩汁只有bb辣，用嚟撈飯食相當唔錯。另外《泰式海南雞半隻》，雞味香， 而且雞肉嫩滑， 就算係雞胸部分亦唔鞋口。 點埋酸酸辣辣嘅泰式海南雞醬， 非常之開胃。誠意推介《醉貓豬頸肉沙律》， 呢一個豬頸肉沙律相當惹味， 炭烤過嘅豬頸肉既肥美又爽口， 用上咗紅蔥頭蒜蓉 青檸汁辣椒等配料來調味， 食起嚟集酸、辣、甜於一身， 相當開胃。用埋新鮮嘅沙律菜包裹住一齊食， 除咗更加健康之外，亦減輕咗油膩感覺。食泰國嘢又點少得泰象啤呢？ 呢一杯清啤清爽而唔苦， 最啱就係配搭一啲濃味嘅嘢食。至於唔飲酒嘅朋友亦可以叫個凍冰冰嘅椰青嚟飲， 既消暑， 又清甜解渴。呢一間泰國餐廳質素相當唔錯， 而且價錢亦相當合理，推薦！