水鴨朱椰子雞 (已結業)

今晩約咗朋友嚟到大角咀食晚飯，係旺角站行過嚟都好方便，食飽飽仲可以散步返去添。Menu 好多嘢食，小菜又有，打邊爐又得，夠多元化。但因為得我哋二人，所以唔嗌得太多，好多餸都係留返下次先試啦。但一定要試嘅就係正宗海南椰子雞。頭先有醬料俾我哋，係用豉油、蒜蓉、青檸同辣椒。但其實隻雞已經好夠味，我都覺得原汁原味好味啲。鍋好簡單，有雞、椰子同竹苼，但簡單嘅材料反而最好味。個湯好飲到不得了，簡直停唔到口，加上竹笙索晒湯底精華，仲正。雞肉好滑同鮮甜，一定要嗌。另外仲嗌咗麻辣雞腎，辣度啱啱好，雞腎爽口彈牙，做送酒小食一流。我哋想食蔬菜所以嗌咗個椒鹽四季豆，好香好鬆脆！