群記牛肉圓豬手

營業中

休息中

一提起粉嶺附近有乜好嘢食，大部份當地人都會話「群記」嘅豬手。响粉嶺一帶做嘢已有一段日子，冇理由唔去試吓。如附圖所見，呢度嘅豬手唔係做南乳去炆，而係類似用水去白烚，要食豬手嘅原味，嚟呢度是一個選擇。平時嘅豬手，因為係炆嘅緣故，所以肉質會比較淋；反之呢度嘅豬手肉質會偏向爽脆，各有各嘅風味，喜惡亦因人而異。想惹味一啲嘅話，千祈唔好錯過呢度嘅辣醬。呢處嘅秘製辣醬，風味近似桂林辣醬。個人認為，白烚豬手本來係平平無奇，但係加上辣醬之後有畫龍點睛之妙。有見及此，店方都特登獨立包裝辣醬零售。我會傾向單買辣醬而捨豬手。有一點要注意，由於係老舖關係，裝修會比較殘舊，而且空調欠奉，建議大熱天時都係唔好堂食，以免响辣醬嘅影響之下食到汗流浹背。一碗豬手麵大約二十五蚊，路經附近，可以一試。