蕃滿門 (已結業)

記得幾年前食過一次蕃滿門，當時好羨慕朋友叫左睇落好好食既脆皮豬手，今次九展睇完戲特意黎一償心願。落單後拎埋部機返位等。脆皮咸豬手蕃茄米線 ($65) 小辣辣度分成6級，由原味、微辣、小辣至巴辣，今次叫左小辣都唔可以睇少，似譚仔三小辣。最估唔到係蕃茄同辣味好夾，辣辣地幾惹味。 濃濃既蕃茄蓉好足料，將蕃茄蓉、充滿蛋汁既滑蛋同米線一啖放入口，全部都滑嘟嘟、味道豐富，好好味。豬手反而有d失色，豬皮根本唔脆，底部更加浸住油，唔算惹味得黎又唔健康。秘製黑椒牛扒蕃茄螺絲粉 ($65) 微辣牛扒只係薄切既雪藏牛肉，類似牛仔骨既味道，可以不試。跟餐飲品揀左泡沫檸檬茶同紅棗蜜。泡沫檸檬茶同普通檸檬茶冇分別，紅棗蜜雖然有紅棗粒但好伏，即使搞勻左蜜糖，大半杯飲落都係普通凍水。個人覺得湯底同麵都做得出色，配料就一般，價錢略貴。格局似food court，好在冇乜客人都坐得鬆動，諗唔到食咩都可以食下。