辣度餐廳 (已結業)

早排行過呢間新開既餐廳，見到店名幾得意，火鍋仲有水果湯底，今晚就決定黎試下。呢度既裝修非常有風格，就連爐上都有舖頭名。佢地主打燒物同火鍋，晚餐就係火鍋，有四款湯底選擇：重慶麻辣鍋、青花椒麻辣鍋、濃湯豬骨鍋、新鮮水果鍋，頭三款可以選擇大中小辣度。我揀左青花椒麻辣鍋既小辣，湯底黎到一開爐已經開始滾，而且立即聞到非常香既花椒味！湯底夠香，有少少麻，小辣亦都岩岩好唔會太辣。嗌左個泰式鳳爪當做打邊爐前既開胃小食，鳳爪夠爽，但做唔到泰式既酸辣，唔夠酸而且完全冇辣味。火鍋配料揀左脆鯇魚片、魷魚鬚、豬腦花、鮮蝦豬肉餃、美國肥牛片、墨魚滑同埋皮蛋。脆鯇魚片真係好脆，魷魚鬚都算大條同新鮮，豬腦花第一次試，口感滑過豆腐。鮮蝦豬肉餃真材實料，裡面真係有一隻蝦，都幾爽口，最中意食呢個。肥牛片呢個價錢黎講質素都唔錯，唔點豉油可以食到湯底既花椒香同牛味。墨魚滑都算打得幾滑，皮蛋則是一般皮蛋冇任何調味。非常推薦青花椒麻辣鍋湯底！而火鍋材料既質素都唔錯，價錢合理，可以一試。