唯一雲貴川風味

營業中

休息中

麻辣粉，酸辣粉，雲南米線，雲貴川。。。開就開到成行成市，冇黎聞味，唔麻唔辣，越開就越難食，想搵間似樣啲嘅都難。我好日都唔去嘅荃灣，咁啱得咁橋有嘢要去做， 啲人又得閒可以陪我行，梗係趁機試試呢間老字號 - 唯一雲貴川風味呢間隱世小店賣嘅唔係光鮮裝修，而係不折不扣，麻，酥，香，辣嘅雲貴川米線。各式麵食有小鍋(走辣)，酸辣，麻辣以供選擇，配料種類繁多，亦有特色配料，如麻辣雞，豬脷，自家製炸醬，辣椒油等。平時舖外排哂長龍，今日有幸時間啱啱好，唔駛排隊直入。酸辣大腸貢丸小辣米線 - 配料雖然唔係咩上等貨色，而且酸辣都計一個餸。不過，佢呢個酸辣卻非一般，大量爆炒過嘅肉碎再用清湯酸菜辣椒餚成酸辣湯底，酸辣甜集於一口湯。酸菜令湯濃而不膩，芽菜爽脆解辣，米線順滑彈牙，比起連鎖店嘅出品高幾皮，味道層次分明，係一流嘅酸辣粉。麻辣貢丸炸醬麻辣雞中辣米線 - 麻辣湯底有齊麻酥香辣四個層次，炸脆嘅辣椒蒜粒為湯底添上焦香，花椒嘅麻中和部分辣味，令人一邊食一邊流汗，都依然一口接一口。炸醬係自家製，份量毫不吝嗇，肉嘅甜跟湯麵非常配合。雖然中辣已經足夠火熱，但眼見枱上嘅特製辣椒油，渣多過油，材料分明，我又豈能當視而不見呢