私家廚房 (已結業)

私房菜一般喺啲隱世啲嘅地方，今晚食呢間私房菜就喺正彌敦道，地點就腳。裝修簡潔，以木枱椅為主。茶錢每位$10，如果唔想飲茶，可以揀薏米水，一大壺$68，咁就唔駛開茶，慳返每位$10啦。薏米水低甜，有好多薏米夠足料。薏米可利尿、去水腫、排毒，夜晚飲總比飲茶好，唔會怕瞓唔著啦。即叫即炸菠蘿生炒骨$118店員大力推介。果然好得，新鮮菠蘿好香甜，非一般罐頭菠蘿能比。生炒骨出奇地冇骨，反而係啖啖都係肉，食得仲方便。脆漿夠薄，入面半肥瘦，咬落去特別滑，滿口油脂。大澳蝦膏通菜炒鮮魷$128一上枱就聞到好香蝦膏味，通菜夠嫩綠，爽脆有鑊氣。呢味餸用蝦膏煮，一定會偏咸，最啱配返個白飯。沙茶醬粉絲牛肉煲$118大大煲，牛肉竟然密鋪成個鍋面，好誇張。下面係粉絲金菇，吸收晒啲醬汁，好入味。因為坐近廚房，全晚都係起鑊、拋鑊聲，聽到已經知好鑊氣。私房菜價錢都係唔平架，因為叫一份做一份，唔會粗製濫造，但服務一般都係好好。呢度啲餸菜係超大份，我覺得比一般茶記多一倍份量，兩個人食三個餸，有一半係要打包。想食多幾款餸，最好多啲人一齊嚟食。