華昇美食 (已結業)

是日時間好趕，成 2 點先差唔多食得飯，黎到佢已經無哂人執哂野咁，驚佢已經收左爐。問佢有無野食，佢話仲有，最緊要係你啱食，哈哈，呢個老闆娘好好呀。套餐有成十款選擇，應該日日都係咁上下，最後要左個蝦羔炒飯。飯未黎佢就俾左一大碗湯我先，仲同我講話呢碗湯下火喎! 哈哈，我個樣好熱氣咩! 其實飲左我都唔係好飲得出係咩湯，不過個湯夠清甜，幾好飲，而且非常大碗!等左一陣個飯就黎左啦，嘩，感覺幾大碗下，唔知食唔食得哂呢。賣相唔差，有隻炒蛋係上面，不過側邊幾條菜就好似HEA左少少 XD。個飯炒得好香好濃味，唔散乾身，不過感覺唔係好多油。而且都算幾多料，有好多雞肉，切到一粒粒，不過有D食落口感覺粗糙左少少，即係好唔滑既感覺。加埋炒蛋幾好味，可以調劑下D鹹味，最鍾意食個D帶少少甜味既臘腸，非常惹味。食完再慢慢飲埋碗湯佢，個段時間完全無人騷擾，可以慢慢睇下電影咁，係一個食LUNCH既好地方。感覺佢夜晚都唔錯喎，搵機會試下先。