番茄師兄

營業中

休息中

本身諗住去深水埗好出名嘅蘇媽蘇媽食晚餐，點知排晒長龍，見隔離有一間番茄師兄，主打食番茄麵，好似都幾吸引，於是我哋就轉肽過隔離食！餐廳主打番茄湯底，如果唔食番茄湯底，可以加$10轉一個好普通嘅魚湯😂😂至於配料方面，呢度你可以選擇食豬、牛或者海鮮。而麵亦都有四款選擇，分別係上海麵、米線、日式拉麵同埋烏冬。我就點左一碗一貝子，揀咗要烏冬，因為見到餐廳入邊嘅電視介紹話呢度嘅烏冬係採用日本師傅每日新鮮製造既烏冬！一貝子分別有五隻新鮮嘅大花蜆，同埋兩隻北海道刺身級帶子。另外仲有差不多原個番茄， 好足料。番茄湯底非常之濃郁，唔係坊間一啲普通既番茄湯底， 食過有一啲簡直就好似用茄汁開水咁，呢度嘅番茄湯底好明顯係用咗好多番茄去煲出嚟，係番茄湯入邊係會識到好多煲到爛咗嘅茄肉。至於啲蜆，非常大隻之餘仲要係冇沙，而且好鮮甜。