牛舞日本燒肉‧涮涮鍋放題 (1亞太中心) (已結業)

最近係同事口中得知公司附近開咗一間幾高質嘅燒肉店，所以今日就特登去試下係咪咁正。😋燒肉放題有五種價錢，見到有日本和牛任食，為食嘅我當然唔會放過呢個機會啦。餐廳環境乾淨企理，用手機 App 落完單後就行出去睇下有咩熟食同飲品，飲品款式雖然唔太多，但竟然有即磨咖啡 😱 相當有誠意，啱晒我呢個咖啡控 🥰 中間嘅雪櫃就擺放咗火鍋嘅配料同冷盤，而熟食區就有炒飯、芝士漢堡扒等等、另外重有生果、甜品都一應俱全。和牛相當高質，雪花紋超級靚，而且唔會好似某啲無良餐廳咁切到勁薄咁上枱，海鮮同刺身亦同樣出色，海蝦更加係虎蝦所以肉質非常彈牙，刺身重有帶子可以任食 🤤 除咗以上嘅食品，仲有串燒及炸物提供，點咗一份天婦羅軟殼蟹，軟殼蟹相當大件啖啖肉。