巴辣仔烤魚雞煲 (聯發樓) (已結業)

本身今日同媽媽約好咗，係去附近一間好出名嘅Cafe，但係呢日原來冇營業，就喺附近周圍行，諗住求其搵間餐廳食啦，點知媽媽話有朋友介紹呢間嘅烤魚好好食，可惜我哋入到去嗰種魚已經賣晒啦，咁我哋就唯有試吓佢嘅下午茶餐：米線！真係超級有驚喜，首先碗米線係勁大碗，可以揀兩款肉食加一款素食，價錢都只係$36。佢仲有送好多款嘅手搖飲品，我揀咗青蘋果檸檬茶，入邊真係有檸檬🍋，飲品超級大杯，係平時手搖店嘅加大杯裝，其實淨係呢杯嘢飲，喺出面買已經值20幾蚊，而味道上亦都係唔錯，唔會係好廉價嘅嗰種沖劑。米線方便，個湯底係魚湯嚟嘅，我選擇左清湯，已經覺得好好味啦，米線嘅材料同平時食嘅連鎖米線店差唔多，份量都好足，最正嘅係佢好似火鍋配料咁，佢可以自己加麻油、蒜蓉、乾蔥、辣椒等等，有一種好傳統嘅川味喺入面，呢個茶餐真係超級抵，我下次都好想再食！