雅高·33

營業中

休息中

通常喺荃灣搵食都會喺商場，比較少踏足去住宅區，不過有次經過見到呢間餐廳做緊一個好厲害嘅套餐，就係斧頭扒放題。其實計落條數，呢一餐同普通放題都差唔多價錢，加上又可以食牛扒同豬手，所以就膽粗粗試一下喇。一上菜嘅時候真係尖叫咗出嚟，我同女朋友兩個人都未試過食一塊咁大嘅扒，仲要加埋只豬手。淨係個賣相已經贏曬，最啱攞嚟打卡用嘅。斧頭扒我哋配上咗黑椒汁。斧頭扒處理得恰到好處，咁大塊都唔會好韌，而且都有唔少肉汁，都幾好食架。反而豬手先係重點，我覺得豬手炆得好腍。佢係做到入口即溶嘅感覺。我成日以為入口即溶都會有代價，就係有好多肥豬肉，不過呢件豬手整得都還好，唔會太肥膩，值得一試。講到明係放題，職員話嘅，如果成碟食哂嘅話，佢會再補上一整碟。我食完一碟已經投曬降啦，但係我見到隔離枱真係叫多一碟，佢哋真係厲害。另外呢個餐都送的餐湯同埋蒜蓉包，不過不失啦。除咗斧頭扒同豬手之外，佢哋都仲有幾個餸係可以任食嘅，噉我隨量叫咗兩個，第一個係雞錘，值得一讚係佢嘅伴碟都非常之靚仔，唔會話因為任食求祈上菜，一客四件都係唔錯嘅，味道少少辣辣地。另外一個係雞絲沙律，雞絲分量都多，食落清爽。總結嚟講，呢度係一間食肉獸必去嘅地方。