大山日本料理

營業中

休息中

呢一間開喺兆萬對面嘅餐廳，應該係新開嘅，因為記得之前呢度係食麵嘅位置，而家竟然開咗一間質素都唔錯嘅日本餐廳，價錢一啲都唔貴，CP值勁高！我同朋友兩個人好似放題咁不斷喺度嗌嘢食，因為佢嘅價錢真係好抵食，雖然呢一度冇壽司手卷嗰啲，但係對於我呢啲咁鍾意食熟食同刺身嘅人，就啱啱好滿足晒我兩樣嘢啦！首先講吓佢嘅刺身拼盤，包括左右三文魚、吞拿魚、赤蝦同埋油甘魚，個人認為佢嘅油甘魚好好食，好新鮮，而且每一塊刺身都切到好厚身！咁鍾意食雞軟骨嘅我，就梗係要嗌佢哋嘅炸雞軟骨食下啦，份量好多，而且配埋檸檬汁，炸得唔會好燶，亦都唔會好咸。而佢呢度亦都有一款幾特別嘅沙律，就係黑松露三文魚沙律啦，呢一款沙律真係令我食唔停口，黑松露味好香，而且同三文魚真係好夾，配埋啲沙律菜食亦都唔會覺得好乾。