牛太 (已結業)

住開荃灣區嘅話大概唔會對牛太呢間日式燒肉放題覺得陌生，繁忙時間基本上都要等位，坐無虛席。以往我多數都係晚市時段先會嚟呢度，但係今日咁啱Lunch hour經過呢邊，先發現原來牛太嘅Lunch set原來係咁抵食嘅！牛太嘅Lunch 🥙 set供應時間由12:00pm開始至到5:00pm，分別有午市定食同埋BBQ set揀，但係既然一場嚟到以燒肉聞名嘅牛太，咁梗係食返BBQ set先抵架喇！今次我點嘅係一客 BBQ set ：人氣豚三品盛合（三款豬肉：豬腩肉+豚脊肉+豚頸肉）！無錯，雖然牛太最出名嘅係燒牛肉，但其實呢度燒豚肉都一樣係別有一番風味嘅！午餐時段只要加$5就有埋野飲，我加左可樂，認真超值抵食！用平板電腦點完餐之後野食好快就送到，除左三款豬肉之外，跟餐仲有湯、飯、同埋沙律，相當豐富。每款豬肉都有幾塊，自己慢慢燒，相當享受。三款豬肉味道可謂各有千秋，有不同嘅口感同油香，燒完出嚟啖啖肉汁非常juicy，用嚟撈佢碗珍珠米白飯認真一流！今餐食得咁正埋單都只係一百蚊左右，性價比真係非常之高！間中出嚟咁樣嘆一餐真係對自己最大嘅獎勵！