麵尊

營業中

休息中

一直聽講銅鑼灣呢間車仔麵好好食，唔止見到好多youtuber介紹，連我個friend都話佢一個禮拜會去食一次，所以今次一於跟我個friend去試下睇下係咪真係咁好食。餐廳位於登龍街，喺時代廣場出口行一陣就到，位置好方便 。我地大概六點半左右去到 ，已經有幾個人排緊隊。車仔麵有好多麵底同埋配料可以選擇，每款都係平均十蚊左右，實在太肚餓嘅我叫咗蘿蔔，豬紅，咖哩魷魚同埋豬大腸。麵就揀左油麵，湯底要咗腩汁加咖哩辣。碗麵嚟到真係好大碗，堆滿曬配料，油麵煮得唔錯，軟硬度啱啱好，食落夠滑。試咗啖湯底，真係驚為天人咁正，腩汁好夠味超濃郁，加上微微辣味 ，惹味得黎呢但係又帶有清甜，真係就咁飲我都可以飲一碗。配料黎講：蘿蔔同豬大腸都好出色，蘿蔔完全冇渣好甜，大腸清潔得好乾淨，微微煙韌。豬紅同魷魚都屬中上水平，新鮮彈牙。另外我都偷咗我個friend嘅一粒冬菇黎試，冬菇好入味。大胃王嘅我哋仲單叫咗一碟豬頸肉share。豬頸肉都畀得幾多塊 食落肥嫩，油脂感啱啱好，浸埋落啲湯度食更加好味，整體嚟講呢間車仔麵可以稱得上暫時我喺香港食過最好食嘅，大家真係可以去試下。