喜記避風塘炒辣蟹 (謝斐道)

營業中

休息中

早就聽聞灣仔喜記係避風塘炒蟹界嘅「傳說級老店」，趁住朋友生日決定直撲元祖店朝聖！門面充滿舊香港風味，紅色燈箱寫住大大個「蟹」字🤤 招牌避風塘炒辣蟹（特大蟹）🦀 師傅拎住隻「巨無霸」肉蟹落鑊，炸到金黃嘅蒜粒、辣椒同金蒜鋪到成蟹身都係，未食已經聞到濃濃鑊氣香！滿滿蟹膏爆晒出嚟，連蟹鉗食到啖啖肉！朋友邊剝殼邊講：「呢度蟹膏多到似食緊流沙包咁！」😂 椒鹽大瀨尿蝦（有膏版）🍤 上菜時已經見到蝦身開嗮，橙紅色膏體從縫隙透出嚟，未食先興奮！外層椒鹽炸到酥脆，重點係每隻都有厚實嘅膏～椒鹽九肚魚🐟 平時食開細細條，呢度每一條都似手指咁長，炸漿薄到幾乎見到魚身，咬落去外皮脆，內裡魚肉軟滑，椒鹽味恰到好處，唔會蓋過魚鮮！ 辣酒煮花螺🐚 花螺陣陣酒香飄出，螺肉超大粒，用針一挑就完整拖出嚟，彈牙得黎帶少少辣勁，酒汁滲到螺肉，咬開陣陣回甘，吸滿汁後更惹味潮式蠔仔肉碎粥🍲 最後收尾一定要叫呢碗「隱藏殺手」！鋪滿鮮甜蠔仔同軟嫩肉碎，肉碎帶點胡椒粉香，暖胃又解辣！ 埋單時見到牆上貼滿名人合照，果然係「明星級食店」，食材新鮮份量足，師傅鑊氣功架十足，難怪開業幾十年依然大排長龍💥