牛大人台灣火鍋吃到飽 (銅鑼灣廣場二期)

營業中

休息中

啲朋友個個食過都讚不絕口，所以我專登早咗大半個月，預約咗銅鑼灣牛大人同朋友慶祝生日。不過都揀唔到啲咩好時間，所以預約咗夜晚9:30。去到都座無虛席，全場坐滿晒。坐低就先要揀食邊一個plan，價錢分別係$178/218/268，價錢越貴食物品種越多，我就揀咗中間嗰個，做會員可以有優惠券扣番啲。湯底有九款每一款都好特別特別有台灣風味，我揀咗白肉酸菜鍋+秘方麻辣鍋。同平時食開嗰啲港式邊爐湯底好唔同。火鍋配料種類好多，其中推薦蟹子墨汁漿、干貝鮮魚漿、澎湖花枝漿、即炸午餐肉、私房鴨血。呢幾款都係要order嘅，佢另外仲有一個自助區有啲丸同埋蔬菜可以自取，種類都非常之多。飲品款式都非常多，其中比較喜歡桂花烏龍，菊花普洱，無糖仲要大大支，唔使好似平時打邊爐飲汽水咁有罪惡咁。熟食真豬小香腸、皮蛋豆腐同埋梅甘脆薯三總都好好食！唔好錯過。飯後甜品唔好嗌雪糕，因為雪糕咪又係咁，佢個仙草凍真係好美味！整體來講，完全對得住佢價錢同埋排隊，有機會一定再食。