魚米之尊 (已結業)

基本上，下面個食評已經寫得好詳盡，小弟就多左碟炒蜆、豉油皇煎蝦、豉汁排骨蒸河粉同奶皇飽，而我最欣賞係佢地每個菜色既味道分明，而且全部即整，上檯熱辣辣，絕冇楂流攤，食唔晒仲可以打包，$110 蚊成廿個菜色，免茶芥同加一，現今社會黎講都可以算得超值，味道方面亦頗滿意，招呼就一般啦，咖啡、奶茶、檸水、杏霜之類仲冷熱任飲，對得住你有餘添啦！我見到下面幾位食評家有所爭拗，小弟睇完亦有感而發，覺得時下年青人愈黎愈不負責任，訂檯之後唔去又唔會打電話去取消，訂左私房菜又可以拉大隊走，當然，一般私房菜會預早兩日收齊錢先開餐，都癈事同你嘈，但係魚米之尊連訂金都冇收，所以先有咁既事發生，如果，大家同意做人應該有誠信既話，咁係咪應該為自己所犯某些錯誤而負上責任呢？覺得道理不在己方既時條，就搬阿劉德華金句上檯，其實服務業雖則以顧客為先，但並不代表你可以當人下人咁駛；易地而處，如果你成班朋友約上你屋企搞大食會，叫你俾住錢買食物先，到時又一句唔黎又唔俾錢，理由係Ｄ食物咪叫你屋企人食晒佢囉，你地又冇蝕底既？咁你又覺得點呢？如果你話店方態度唔好，係店方理虧，如果你話店方唔老實，我覺得唔老實既係你臨時取消又唔肯俾錢既朋友