Brass Spoon (已結業)

中上環的越南餐廳開到成行成市, 最近比較有名的就係蔡瀾開的越式牛河。不過因為蔡瀾個間太多人啦, 我只好食另一間已經開左一段時間的Brass Spoon。早排某雜誌做過一次坊間越南牛河的比較, Brass Spoon係各方面都比較理想。作為越南河粉的愛好者, 就去試一試。呢度的選擇不多, 主要真係食越式牛肉河, 而且仲分左級數。因為處於中環, 個價都真係幾「中環」, 平均一碗最少都要$80以上。但呢間野貼心的地方係可以俾客人自己選擇配料的多少同埋牛油的多少。黎到之後, 望落去都幾大碗, 男仔都叫做夠食。食越式湯河, 識食一定先飲一啖湯。呢度的湯底唔係走清淡路線, 但亦唔算太濃, 飲得出係應該用左牛骨去淆湯。對我黎講, 係好飲既, 所以我飲多幾啖先食個河粉。河粉唔淋, 唔會一夾就斷, 而呢度的河粉相對比香港食到的係較幼身, 但米味唔夠香。至於重點, 就係個牛肉, 粉紅嫩色, 唔韌又有口感, 但可能唔係最高級個隻, 所以牛味濃度一般。整體黎講, 都中規中距, 以呢個價錢黎講有點貴。