金滿都越南餐廳 (已結業)

去開長沙灣做嘢，搵個地方坐低唞一唞。原來金滿都有長沙灣分店，仲好好彩比我撞正下午茶時間。選擇多而且價錢超實惠。牛肉河粉係必點的，牛肉湯味道都幾濃厚。配料亦都算幾多，三款配料都好足料。套餐的好處就係可以用好相宜的價錢加配小食，沙嗲一客有兩串。肉質幾有咬口而且沙嗲汁好惹味。生菜包有少少驚喜，同我哋平時的生菜包有點不一樣。餡料以素菜為主。雞翼就超好食，外皮脆卜卜又香口，內裏肉汁嫩滑又多汁。豬頸肉亦絕不遜色，點上特色的甜酸辣醬就更加停唔到口。同事仔話今日做嘢做得咁辛苦，要食盡佢！竟然嗌咗一大煲咖喱牛腩。係黃咖喱為主的咖喱底，有輕輕的椰汁味，帶點微辣，都幾好食。值得欣賞的是牛腩份量超多，而且每一件都煮得好入味。非常豐富的下午茶，解一天的勞累。