之前係元朗食過已經覺得好正, 但元朗對九龍人黎講的確係有D偏遠, 早前好開心聽到鮨文係黃埔開分店, 今日終於又搵到籍口奬勵自己黎食多次!! 黎到黃埔分店鮨文大門前, 真係唔係朋友上網睇過確實係呢個門口, 都唔敢推門內進, 因為門前完全沒有店名, 充滿神秘感呀~~
入面裝修同元朗店大致一樣, 但就大左好多,仲有一間房仔提供比客人BOOK, 甘私隱度就更高, 啱晒自己人一齊黎高興下時都唔怕嘈到隔離, 房間最低消費係一萬蚊, 最多可以容納七個人, 整體店面大左, 可以坐到四十幾個人, 甘就易BOOK左好多了...
我地揀左每位HK$1750+10% 既廚師發辦套餐, 其他一切就交比梓健師傅你啦~~
茶碗蒸
先黎一個茶碗蒸, 上面係鰻魚, 下面係蒸蛋, 入面仲有細細粒既元貝同菇菌, 食落非常鮮甜...
愛媛縣鰻魚BB
呢碗鰻魚BB賣相有D似白飯魚, 但細心睇清楚佢係扁而且闊身, 肉身透明, 口感好滑溜, 一食就直落喉嚨...
鱈魚白子
我唔知今晚有安排白子, 師傅雖然之前有問過有乜野唔食, 但我無答到唔食白子, 我本人幾怕呢個賣相, 但尊重師傅既安排, 我一口吞左落肚! 我以後都會記得講ga la...
櫻煮八爪魚
其實櫻煮係指慢煮既意思, 第一日要幫八爪魚做按摩, 第二日就係要慢煮, 而第三日就要攞去浸, 經過多重功夫, 慢煮出黎既八爪魚既肉質何其軟身, 比傳統烹調韌實既口感截然不同, 食落非常鮮嫩, 配埋少少柚子胡椒同食, 令鮮味更突出呀~~
螢光魷魚+沖繩水蕓
一邊係黎自日本富山灣既螢光魷魚, 魚身柔韌多汁, 入面飽滿魷魚子, 師傅話而家係熟食, 遲D到螢光魷魚既季節, 貨源穩定時就可以刺身食了!! 而另一邊就係自沖繩既水蕓, 賣相類似髮菜, 係一種藻類植物, 入口好滑, 味道清淡...
淮山+蘿蔔
為左係等食既時候有d野食下, 師傅比左d 淮山同煙燻過既蘿蔔比我地食, 我好喜歡淮山個種獨特既口感同味道呀~~
太刀魚昆布卷
昆布卷入面係太刀魚, 而太刀魚係屬於貴價魚之一, 係因為呢種魚係需要人手一條一條釣上黎的, 食落味道獨特, 層次豐富~~
大分縣青鮑魚
青鮑魚肉質非常爽彈, 沾上少少鮑魚肝醬令味道更提鮮, 之後師傅比左一細舊飯比我地, 沾埋剩餘既鮑魚肝醬, 又好食又唔浪費, 正~~
金目鯛壽司
金目鯛既魚脂同肉既比例均衡, 肉質細嫩肥美, 味道鮮甜, 口感爽滑, 幾乎入口即溶甘濟...
鱈魚BB壽司
鱈魚BB太約重1-2kg, 肉質好鮮嫩, 配以白麵豉醬食味道更佳~~
三文魚籽壽司
超大粒既三文魚籽, 粒粒晶瑩剔透非常之飽滿, 食落係口中爆開, 唔單止無腥既味道而且仲好鮮甜~~
青柳壽司
青柳屬貝類食材, 睇住師傅現場花左好多功夫將肉從貝殼除出及清洗乾脆, 配以橘子汁同食, 味道好爽脆及鮮甜, 正~~
關鯖魚壽司
關鯖魚冬天係最肥美的, 肉質爽脆, 以及油脂帶黎更加濃厚既鮮味, 令我一食就愛上~~
縞蝦壽司
黎自北海道既縞蝦可算是蝦中比較矜貴既一種,比牡丹蝦既產量仲要少, 入口肉質緊實, 之後細緻鮮甜, 最後攞埋個蝦頭去炸, 食落好香脆可口~~
大拖羅壽司
大拖羅係吞拿魚腩位, 油脂含量非常之高, 一入口油香已經席捲入味蕾呀!! 好想追食落去呀...
櫻葉白飯魚壽司
櫻葉白飯魚可能櫻葉味太重, 我本人就唔係太喜歡食...
北海道海膽杯
我全晚最最最期待既就係呢杯北海道海膽杯啦~~用上白雲丹同赤雲丹北海道海膽一層一層堆砌成的, 上面加上牡丹蝦, 下面就係壽司飯, 賣相澎湃, 海膽食落幼滑鮮甜而且味道濃郁, 食完非常之有滿足感~~
右口魚(鰈魚)手卷
右口魚好嫩滑呀! 食埋真係飽到上心口呀~~
魚湯
最後飲埋碗魚湯, 味道非常之濃郁又唔腥, 真係無得輪呀~~
果物
食到最後緊係要返件飯後果啦!! 係青肉蜜瓜上噴上少少Whisky, 令蜜瓜既甜度提升, 好好食呀~~唔知下次又幾時可以黎食過呢!? 偶然比籍口自己黎豪一次, 其實真係幾開心同滿足!!
