沙田新強記燒鵝海鮮酒家

營業中

休息中

今日嚟到享負盛名嘅沙田大圍新強記食晚飯，餐廳門面相當古色古香，門口有一對大紅燈籠高高掛，入到餐廳除咗大堂有兩盞好大嘅水晶吊燈之外，牆上面仲有呢一幅綠油油嘅山水壁畫，好一個傳統嘅中式格局，我哋揀咗個四人套餐，有湯有羹有乳鴿兩隻有小菜三碟同埋一個炒飯，陣容鼎盛。金牌燒乳鴿兩隻，燒乳鴿率先送上，侍應一放碟乳鴿上枱即刻香氣四溢，乳鴿皮脆肉嫩，味道鮮美，加上熱辣辣嘅溫度，果然不愧為餐廳嘅招牌菜。黃金粟米魚肚羹，跟住嚟嘅係粟米魚肚羹，上枱時候嘅溫度係熱到要攤一陣先可以擺入口，魚肚切到一粒粒，好似肉丁咁樣，一啖幾粒口感唔錯，而且蘊藏量豐，鍾意食魚肚嘅我大愛。菠蘿生炒骨，生炒骨炸得酥脆，酸酸甜甜十分開胃，我食生炒骨通常連配菜都唔會放過，紅椒、青椒、紫洋蔥、菠蘿通通俾我掃哂，我覺得將啲配菜夾埋啲生炒骨一齊食係最好味嘅。沙爹牛肉炒芥蘭，芥蘭嬌嫩爽甜，牛肉嘅份量不少，配上沙嗲汁同埋薑粒同炒，可以餸到好多碗飯。椒鹽脆豆腐，呢個椒鹽脆豆腐令我非常驚喜，炸得外脆內嫩之餘仲帶有微甜，再加上椒鹽嘅加持，對味 味蕾十分衝擊。新強記嘅三寶除咗燒乳鴿之外仲有燒鵝皇同埋雞粥，下次嚟試埋呢兩樣先。