今次叫咗個 「特選四人前料理」（$1480），樣樣有啲，唔使左諗右諗。
另外加支 「善之水特別純米」，清酒米香淡雅柔滑，飲落順喉，同食物幾夾，幾個人share 剛剛好。
先係前菜既豚肉沙律
豚片肉嫩唔肥膩，份量唔細，加埋滋味日式胡麻醬汁拌食，成份沙律感覺清新醒胃！
刺身四品 有油甘魚、赤蝦、三文魚同磯煮鮑魚。
厚切魚生切片，肥美油甘魚絕對係最愛，嚴選腩位，細嚼交集出油脂豐厚感，軟綿甘香。三文魚同樣大件美味
赤蝦好新鮮，燈光下亮澤晶瑩，蝦味濃蝦肉回彈，可省略刺身豉油，直接品嚐蝦🦐純鮮原味。磯煮鮑魚彈牙唔韌，幾有驚喜。
海の幸 海膽卷
迷你小卷上面有creamy海膽同白蔥絲，內層配襯角切魚生黃瓜飯卷，豐盛鮮味，唔會太飽滯。
飲Sake一定要有串燒，
大大串牛舌，盬燒製作灑上黑椒粒，入口香熱兼軟嫩。
金黃油香既免治雞肉串，口感爽脆，咸香惹味，佐酒十分開胃。
熱騰騰石鍋鯛魚湯，湯頭奶白魚香濃郁。
一啖入喉暖在心，鍋底內豐富野菜、菇菌及滑溜豆腐煮湯，味道特別鮮甜
鐵板燒有A4 和牛薄燒 油花均勻，燒完捲住蔥蒜，牛味香濃。
鐵板蟹肉炒飯，鑊氣夠，飯粒分明，蟹肉都幾多，食到尾都唔覺膩。
最後以 香芒奶凍作結，奶凍滑溜，芒果醬自然清甜，為成餐飯畫上舒服嘅句號。
