東京食堂 (已結業)

東京食堂真係好隱蔽，我第一次去嘅時候，來回咗幾次先搵到個入口，不過撞正晏晝落場時間，無緣幫襯。今次終於食到啦。叫咗個牛肉壽喜燒定食，白飯轉貓飯。首先要講下個飯，貓飯即係加咗牛油，紫菜，木魚片同鰹魚醬油嘅飯，基本上夠哂味，好好食，唔使食餸都可以啪哂成碗飯。前菜嘅蟹肉忌廉薯餅同味噌湯都係現成嘢，正常水準，至於個牛肉壽喜燒就好豐富，除咗份量非常多嘅牛肉之外，仲有金菇，雜菇同洋蔥，食物嘅熱力將隻生雞蛋變成蛋花，令到湯汁鮮甜之外加上質感，我忍唔住又飲到見底。食完成個餐，感覺超滿足。