鏞記酒家

喺西環住咗幾十年，講真，真係好少會專登過嚟中環食呢啲「名店」，感覺都係做遊客生意。不過今次住澳洲嘅阿姨返嚟探親，指名話掛住以前啲味道，就唯有捨命陪君子。
個「脆皮乳豬」一上枱，阿姨已經心心眼，塊皮真係化嘅，脆卜卜，佢話喺外國食唔返呢隻味。個「煎脆麵」都好有懷舊feel，麵底煎到金黃香脆，啲銀芽肉絲芡汁淋上去，一半脆一半軟，口感好得意。仲有個欖角豚雙寶，味道家常得嚟又夠惹味，啱晒啲老人家口味。銀稔醬雞煲都幾特別，醬汁酸酸甜甜，好開胃。最後個甜品杏仁凍豆腐，杏仁味香濃，質感好滑，成餐飯有個好嘅收尾。
雖然平時唔會專登過嚟食，但見到長輩食得咁開心，不停話搵返細個嘅回憶，就覺得乜都抵返晒。