準備已久嘅project終於完成，為咗好好慶祝一下，先生信守承諾帶我嚟食鐵板燒，對上一次食已經幾個月前喺深圳，食材份量比較少，略嫌有啲意猶未盡。今次揀咗位尖沙咀呢間日式鐵板燒，網上評價唔錯加上地理位置方便，我哋一個星期前就預約定。
2
晚市有兩款套餐可以選擇，亦可以散叫。我哋揀咗和牛龍蝦鮑魚套餐二人前，價錢合理，內容超豐盛，仲加入唔少高級食材，感覺物有所值。
點餐後侍應為我哋送上沙律同前菜三小點，分別係煙燻雞肉、日本豆腐同蒜頭漬，清新開胃。
另外點嘅蝶豆花青檸梳打甜度適中，清爽解渴，有別於一般嘅蝶豆花飲品，餐廳將蝶豆花整成冰塊，當蝶豆花冰慢慢溶化，飲品就會出現漸層變色，超級夢幻。
刺身拼盤有牡丹蝦、油甘魚同拖羅，非常新鮮，特別係牡丹蝦，肉質厚實，味道清甜。
產自兵庫縣嘅生蠔體型巨大，已經細心咁樣落埋酸汁，唔需要額外調味，入口帶有淡淡嘅海水味，鮮甜爽口。
完成前菜嘅部份，師傅向我哋展示今晚嘅主菜，海鮮拼盤極度吸睛，巨型伊勢海老配上鮮艷奪目嘅蝦膏，非常邪惡；仲有大大隻嘅鮮活南非鮑魚，仲不停郁緊，令人食指大動！
除咗海鮮，當然唔少得將會用嚟做薄燒卷嘅A4鹿兒島和牛同日本黑毛豬，色澤嫩紅，油脂分佈均勻，賣相吸引。
伊勢海老煎香之後加入用蝦膏煮成嘅醬汁，鮮味濃郁，配上羅勒汁獨有嘅香味，更加激發出伊勢海老嘅鮮甜，加上彈牙嘅肉質，令人回味；蝦頭嘅部份會留返稍後煮湯用，唔會浪費。
完成一道咁高質嘅海鮮之後，侍應為我哋送上間場嘅茶碗蒸，加入咗松露嘅蒸蛋又香又嫩滑，面頭淋上鰹魚汁，底下鋪咗少許木耳絲，令口感同味道都更豐富。
南非鮑魚用海帶蓋住去煎保持鮮嫩，咬落去爽口得嚟唔會太韌，配上自家熬製嘅鮑魚汁同新鮮昆布一齊食，香味更突出；另外師傅專登留低鮑魚肝香煎，係平日比較少食嘅部位，只加入少許鹽調味，細嚼之下非常香口，十分出色！
和牛同黑毛豬薄燒加入鮮筍絲同雜菇，口感豐富，簡單淋上燒汁調味已經好滋味；伴碟嘅蔬菜亦處理得恰到好處，特別係南瓜同蒜片，前者香甜軟糯到好似食緊甜薯咁，後者又香又脆，令人食唔停口。
完成主菜之後侍應為我哋送上剛煮好嘅味噌湯，加入咗龍蝦頭嘅味噌湯鮮香濃郁，非常滋味。
鐵板炒飯加入白飯魚乾、櫻花蝦乾同鰹魚乾，口感非常有層次，仲有自家製嘅酸梅醬，酸甜解膩。食咗一半之後仲可以加入鰹魚湯同芥末做成茶漬飯，另有一番滋味。
最後侍應為我哋送上紅豆雪糕同焦糖多士，焦糖多士入口香脆，帶有濃濃嘅牛油香，非常邪惡。
餐廳食物質素好高，新鮮嘅食材加上師傅嘅巧手，無論係烹調嘅過程定係食物嘅賣相同味道都令人非常享受，另外必須一讚嘅係侍應服務親切熱情，對菜式嘅講解亦非常仔細，非常推薦！
