泰道 (已結業)

帶來自歐洲嘅朋友嚟香港遊玩，喺行完西貢市中心之後沿著海邊行到西沙灣，諗住去食下點心… 點知去到先知道原來已經變咗做泰國菜。之不過因為西沙灣冇其他野食，所以就坐低食少少嘢當下午茶。當日天氣麻麻，之前幾日都一直斷斷續續咁落雨濕濕，所以下晝三點去到得我哋三個客人。點了鹽燒牛舌兩串、沙嗲雞肉四串、一碟小食拼盤（細）同一客菠蘿炒飯。牛舌有啲韌，鬼仔冇興趣，但沙嗲雞幾好食，又大份。個拼盤雖然叫咗「細」嘅，但份量足夠每款食物有四件，好彩問一問個侍應，否則叫咗「大」嘅話都唔知點算。而個菠蘿炒飯味道就有少少行貨、不過不失，份量繼續跟價錢成正比。啲嘢食黎得都幾快，而且在場侍應有兩、三個（其中一男一女似係泰國人），服務唔錯。最正莫過於個無敵海景… 西沙灣對出海面水其實好淺，偶然見到一、兩隻滑浪風帆喺水面滑過，舒舒服服咁… 俾蚊咬～ 唔係講笑，可能當日有落雨但我哋三個都俾蚊叮到怕。結果一食完嘢即刻埋單閃人…題外話：個餐牌好大本，每頁紙都有A3 size… 如果可以縮細少少會易啲揸喺手。