街坊Cafe (已結業)

有一排冇去過旺角行人專用區，今日去嗰邊發覺成條街都有 大叔大媽 團體載歌載舞，而家完全唔適合行街，於是我哋搵咗間餐廳食飯；行到去女人街街尾近住h&m，有一間叫“街坊cafe” 既餐廳見到好多人食， 於是我地入去試試；呢間餐廳有 set dinner，二人餐同埋好多不同嘅單點選擇， 仲有All day breakfast及特色飲品。波士頓龍蝦卡邦拿拉河粉$168我哋點咗一個波士頓龍蝦 set dinner ， 餐湯揀咗碗仔翅， 碗仔翅足料，好有地道 feel ， 另外有個凱撒沙律前菜 ， 沙律菜新鮮不過份量唔多 ，到主菜係波士頓龍蝦夠大隻，肉質彈牙爽口感覺新鮮，而卡邦尼配合河粉呢個新鮮配搭我相信只此一家，之前從未見過，河粉同卡邦尼汁原來係好夾，河粉夠滑，卡邦尼汁夠濃， 絕對值得一試 。意大利黑醋薄牛肉豬仔包三文治$58豬仔包外脆內軟，配合黑醋薄牛肉 及蕃茄沙律菜味道唔錯，薯格非常鬆脆，食曬都仲想食。呢間餐廳座位夠多， 座位闊落， 雖然價錢唔算好街坊，但係食物質素好， 絕對唔係普通街坊餐廳質素，下次去開旺角可以再試。