花火漁屋 (已結業)

近期見到網上好多人介紹呢間日式小店，除左有各式各樣嘅日式料理之外，同時仲有精品咖啡供應。小店位於屯門山景廣場，餐廳以木系裝修為主題，亦以落地玻璃作門面及採光，座位方面，擺枱唔會太密，帶俾人好舒適嘅感覺。晚餐時段除左有套餐之外，仲有各式各樣嘅日式料理，款式都幾多，仲有唔少特色小食添。角切魚生沙律：喜歡食魚生但唔喜歡食飯嘅我，好多時都會叫魚生沙律，大大碗嘅魚生沙律，以＄88黎講真係相當親民，魚生切到細細粒，好易入口，份量亦好多，分別有三文魚、油甘魚、墨魚、八爪魚、吞拿魚，甜蝦同埋車厘茄，配埋蟹籽、沙律菜同埋柚子汁，食落真係相當清新。除此之外都試左佢地嘅海鮮串燒，分別係帶子同埋大蝦。帶子： 串燒係即叫即燒，上檯時係熱辣辣，帶子好大粒，加左醬油燒過後賣相呈金黃色，入口爽口彈牙，好juicy, 非常鮮甜，口感相當豐富。大蝦：至於大蝦真係好大隻，肉質爽口彈牙，食落非常惹味。見呢度d 咖啡好似好出名，我都叫左杯黎試下：Cappuccino:咖啡味香濃，入口非常香滑，配埋精美嘅拉花，完全估唔到係一間日式餐廳內可以品嚐到呀。