蝦匠 (已結業)

九龍城不嬲都係美食集中地，但係平時都係食開泰國嘢，今次試一間唔係泰國餐廳，新開嘅，係福佬村道，食麵為主。星期日晚上嚟到，好好彩唔使等位，啱啱有位可以入座。餐廳環境都幾寬敞，適合三五知己傾計。睇睇個餐牌，麵食為主。湯底可以揀蝦匠湯或者冬陰功湯，主食就除咗麵可以㨂泡飯。配料另加。質感可以選擇油麵等等，都幾有彈性，就好似平時食車仔麵咁樣。我揀咗蝦匠湯油麵，配黑椒牛丸、雞肉同埋魚皮餃，每款另加十蚊。份量比想像中大，用一個大碗裝住。朋友就點咗泡飯，配豆卜，分量都非常充足，朋友話食得好飽。亦點左個小食拼盤，小食拼盤有雞翼、春卷同埋花枝丸，全部都係煎炸小食，都幾好味，唔算炸得好油。蝦蝦霸霸，雖然聽個名唔知咩嚟嘅，但係有圖片睇。係一大塊炸蝦餅，好厚身，好似平時嗰啲雞扒咁厚，食落有口感，接近手掌咁大，可以切開幾份同朋友分享。整體黎講，係滿意既一餐。